اهلاً بكم
استكمالاً لبرنامج كشف حقائق الرياضة في المحروسة
الجزء الاول كان بعنوان : انها حقاً لائحة محترمة
اتكلمنا فيه عن اللايحة بتاعة الاتحادات الرياضية في مصر
النهارده بقا احنا بنتكلم عن موضوع الساعة وكل ساعة
المحترفين
السؤال بيدور في الازهان عن المحترفين ويا تري الاجانب ولا اللي بيطلعوا بره
بتكلم عن اللعيبة اللي تطلع كام شهر بره ترانزيت وترجع للاهلي او للزمالك
والامثلة عندنا كتيرة
احمد بلال : ملا الدنيا دوشة بمفاوضات الزمالك والاهلي معاه وانه قرر يرجع وضحي بملايين الدولارات وحياة كريمة بره علشان خاطر عيون الاهلي
انما في الحقيقة هوا رجع لانه فشل بره واللي فشله انه اتسربع علي الاحتراف وانه قرر الهروب من جحيم مانويل جوزيه
طب يا كابتن مادمت هربت من جحيم جوزيه ايه اللي رجعك تاني ان كنت زي ما بتقول نجحت بره ! مجرد سؤال برىء
طارق السعيد : رجع من بلجيكا علي الزمالك ومنه للاهلي وقرر الاعتزال بعد اصابة خطيرة في الركبة وبرده نفس الاسطوانة المشروخة بتاعتنا
رجعت لبيتي
التوأم الاشهر في تاريخ الكرة المصرية حسام وابراهيم حسن : رجعوا من سويسرا للاهلي مرة تانية
احمد حسن : قرر انه ينهي حياته الاحترافية بره والجماهيرية ويرجع علشان الاهلي
احمد غانم سلطان : حضراتكم ان تفتكروا انه هرب من الزمالك وراح علي دولة مغمورة كروياً تقريباً يوغوسلافيا والزمالك جري وراه بالمشوار واستقبلوزه استقبال الفاتحين وهوا مضافش للزمالك حاجة
محمد عبد الله : تعبتنا طول سنتين في الاهلي انا مظلوم وجوزيه دبحني بسكينته الباردة والزمالك بيفاوضني وريال مدريد عاوزني في الاخر الاهلي باعه لتركيا وكردة فعل علشان يرد بيها علي الاهلي قرر الرجوع للزمالك
وقال بالحرف الواحد في مجلة الهدف : انا خرجت من مصر وعارف اني هرجع علي الزمالك
والامثلة عندي كتيرة وكبيرة
صلب الموضوع :
ليه بنرجع لاعيبتانا بره ؟؟؟؟
فجأة كده بيحلووا في عينينا ونقرر نرجعهم وننهي حياتهم بره ليه
ايه السبب
احنا شعب مرتبط باهله واصحابه اوي
معندناش نظام احترافي يا بشمهندس حسن يا ملك اللوايح
كان اولي بيك تحطلنا اسس نظام احترافي سليم
بدل ما تخترعلنا لايحة ما انزل الله بها من سلطان
اللي نجحوا بره ومكملين قلائل جداً
في منهم اللي لسه بيهابر زي حسام غالي وميدو وشريف اكرامي
وايمن عبد العزيز وابراهيم سعيد
ولما نيجي نقابل الكاميرون او كوت ديفوار نبقا حاطين ايدينا علي قلبنا ولما ننهزم منهم يطلع المدرب يقول
اصل هما عندهم فريق كامل من المحترفين
في اعرق الاندية
انا نفسي اللاعيب عندنا من اول سن ال 13 و14 سنة نوديه بره علي الدوريات القوية
زي الانجليزي او الفرنسي او الايطالي ويلعب هناك هيعيش حياة احترافية بجد
بلاش بقا جري الوحوش بتاع الاهلي والزمالك علي اللاعيب اللي يخرج بره فجأة بيحلو
راح الزمالك تعاقد مع عمرو زكي ب 18 مليون جنيه وهوا كان ناوي يشتريه من انبي ب 2 لا 3 مليون جنيه
الاهلي والاسماعيلي والزممالك جريا ورا حسني عبد ربه لحد ما هيجيبولوه الايقاف
الاهلي راح اشتري احمد فتحي بملايين الجنيهات من انجلترا
السؤال هوا ليه
الدوري اللي طلع دول
يطلع 100 غيرهم
سيبوهم يحترفوا ويشقوا حياتهم الاحترافية
بلاش مفاوضات اهلي وزمالك
اي لاعيب دلوقتي عاوز يرجع مصر
يروح لاي صحفي ويقله الاهلي عاوزني
مسئول زملكاوي يقرا كده يجري وراه ويجيبه
بس علشان الاهلي مياخدوش
اخر كلامي : افتحوا باب الاحتراف للاعيبة الناشئين ع البحري واوعوا تفكروا ترجعوهم مصر حتى ان طلبوا هما كده
ميرجعوش مصر الا بعد الاعتزال
والا هندننا طول عمرنا مرعوبين من الكاميرون وكوت ديفوار والفرق التقيلة
صحيح اننا فزنا عليهم في امم افريقيا اللي فاتت بس مش كل مرة تسلم الجرة
وعلي راي احمد رجب
ربنا يستر ويجعله عامر
